انا والقمر

انا:
يا بختك يا بدر الليـــــل..عندك صبـــح تغفي فيه
لانك شايل حمل ثقيـــل..ولا أنت معاني اللي معانيه
الخاطر من حرقة وهمــوم..وجفني اللــي ما غفّا يوم
ولا ذوقني طعم النــــوم..تقول مسـخّر نبــكي بيه
القمر:
ليش وايش أسباب عذابك..وايش اللـــــي خلاك تحير
فضفضلي وافتحلي كتابك..واطمـــــــن سرك في بير
ونا عالياس معاك سنـد..ضـاوي نـــوري خيـر وود
وقبلك ياما مــــالاحد..شكـولـي وكنـت بنصح وجيـه
انا:
باهي نحكيلك شن ساير..واحـــكم منهـو اللي غلطـان
لقيت حبيبي غيري دايــر..معشوق وبــــاع اللي كان
نكرني وين المال أغـراه..تجاهل كــــــل أيام هـواه
وكافاني بظلمه وخطــاه..مش عـارف كيـف هنت عليـه
القمر:
اسمعني نعطيك نصيحــة..ودير اللــــي تلقاه صواب
قبلك ياما قلوب جريحــة..كـانوا بــود وشوق أحبـاب
ولكن رضيوا بالمــكتوب..القسميـــه ما منها هـروب
تباعد واصبر وانسي صوب..الخاطـــــي مولانا يـجازيه

انا انقول ان الكلام علي الجرح تمام ومعظم الناس حاصل معهم نفس الكلام إلا انا طبعا ياريت كل من يقراء الكلام يأخد بالنصيحة الموجودة في اخر


لو يسألوني لمن تهدي الكلام انقول لكل من مر بالتجربه هذه